Monday, 18 September 2017

மறந்துபோனதே!!

காய்ச்சல் வந்தால்
எப்படி நடந்து கொள்வேன்
மறந்து போயிற்றே..

இரு போர்வை மூடியும்
தாளாத குளிர்...
மூக்கும் தன் பணி மறந்திட்டது
போன்ற சுவாசம்..
சுவாசம் அடைத்திட்டநாசியையும்
ஏமாற்றி ஒழுகிடும்மூக்கு..

அடித்த அலாரம் தாண்டி
தூங்கவிடாத கடமை
கை கால்களில்
செயற்கை புத்துணர்ச்சி தந்தது..

பருப்பு சோறும்
வெண்டைக்காய் கூட்டும்
கோவக்காய்பொரியலும்
டப்பாவை நிரப்ப..
காலை தோசை
தேங்காய்சட்னியுடன்
இணைந்தது...

ஆமாம்..
காய்ச்சல் வந்தால்
எப்படி நடந்து கொள்வேன்
மறந்து போயிற்றே...

ஒழுகிடும் மூக்கை
துடைத்திட பழைய
துணி கிழித்தெடுத்துக் கொண்டு
பணிக்கும் கிளம்பியாச்சு..
எரியும் கண்களும்
நடுங்கிடும் தேகமுமாய்
காய்ச்சல் கடமையாற்ற..
என் கடமை இயற்ற
இயலாது போனது...

ஆமாம்..
காய்ச்சல் வந்தால்
எப்படி நடந்து கொள்வேன்
மறந்து போயிற்றே...

ஒத்தையாய் போய்
ஊசிபோட்டு வீடு திரும்ப..
சாரலோடு மழை
வரவும் சரியாக இருந்தது..
காய்ந்திட்ட துணிகளை
அள்ளிப் போட்டு
பாதி நனைந்துபோன
நிலையில் சோஃபா வில் சாய
காய்ச்சல் நியாபகம் வந்தது..
இறுகும் தொண்டைக்கு
இதமாய் காபிகலக்கித்தரும்
கைக்காக ஏங்கியவாறு..
அடுப்படி நுழைந்தேன்..

ஆமாம்..
காய்ச்சல் வந்தால்
எப்படி நடந்து கொள்வேன்
மறந்து போயிற்றே...